ع القهوة
ع القهوة
شاى ويا تماسى
وناس همومها على الكراسى
وصوانى دايرة بحكاويها
ووقت ضايع أو ناسى
ع القهوة
شيشة ودخانه
توصل لصدرك قلقانة
تفاحة نايمة ونعسانة
ع الفحم وأنت اللى هاويها
ع القهوة
حكايات تداريها
عناوينها سودة ف عيونك
ف غفلة عنها تداديها وهى تحلف ما تفوتك
ع القهوة
نعناع ومداوى
يسحر ف أوجاع ويداوى
وأنت اللى ناوى تكون غاوى
عمرك يضيع على أراضيها
شيش بيش
ما فيش حاجة مفيدة
ولا ساعة من نوعها فريدة
واللعبة دايرة بتنهيده
ولا راحة وياك حاتعدى
ع القهوة
كوتشينة وضومنو
ولا ناس ف وقتك يتضمنوا
ولد يشيل أحلى ما فيها
شايب يقاسى من زمنه
ع القهوة
أغراب وحبايب
الود عنهم شئ غايب
وكل واحد ف القالب
والعمر والله مالوش صاحب
ع القهوة
تلقى وشوش ووشوش
وقلوب حزينة بتتبسم
ينسون بينسى ويتناسى
والهم على عوده يقسم
ع القهوة.. ع القهوة
........................................
ـ نُشرت هذه القصيدة فى موقع دنيا
الرأى على الرابط التالى
http://pulpit.alwatanvoice.com/articles/2012/10/12/273854.html
ليست هناك تعليقات:
إرسال تعليق