على جناح الكتابة

على جناح الكتابة

بتنفس بالكتابة..

وباحلم بالكتابة..

وأغنى ع الربابة..

أحزم فى حروفى..

إحساسى يقول لى بوحى..

ترقص فيا الكتابة..

تمنع حالة رتابة..

سلطان يدخل بنوره..

يعدى زمن الكآبة..

أنبش ف حنين لذاتى..

وأترفع باجتهادى..

وجناحى الافتراضى..

يلمح فيا الغرابة..

أشعر إن الشوارع..

بتاخدنى ف اتساعها..

والدنيا حلوة جدا..

والجنة بين ربوعها..

وأنا باستنشق سعادة..

وانسى روحى ف ربيعها..

وأغنى ع الربابة..

أمشى ف محراب كتابة..

آخد وياها وأدى..

تطاوعنى وتلقى ودى..

أرتاح على صدر صفحة..

وأبقى عروسة بطرحة..

ويا القلم .. عريسى..

والسطر دا ونيسى..

والكوشة ف القصيدة..

وزفاف مبدور مشاعر..

إحساس ف قلب شاعر..

زغرد على فرح عوده..

لما عرفت وعوده..

ولقى أحضان تضمه..

فرح وحب وأمان..

كما بصدر أمه..

لفلف حنين ميوله..

قرر يتحدى يومه..

ويملك حق ذاته..

وفكره دا حياته..

ونشوة بين ساعاته..

ويا رقصة حروفه..

قوة تتحدى خوفه..

على نغمة الكتابة..

وأنا زى ناس كتيرة..

غنية بين عالمها..

بإحساسها وبقلمها..

بتغنى لحن ليها..

له قيمة بس فيها..

أنا م الناس الغلابة..

اللى عشقوا الكتابة..