يشبه بعضه
(1)
لا الفقير دا عاجبه فقره
لا الغنى عاجبه غناه
كل عايش يشكى قهره
والضمير دا بيننا تاه
يا قطر العمر يا اللى
واخد معاك شبابنا
عدى هدى سمى
ع الحظ وع اللى نابنا
(2)
الخوف العاجز
ف الصدر المسكون
ف العمر القلقان
خايف ليموت
ما هو إنسان
حايموت من غير إنذار
وف أى أوان
طب خايف من إيه
ما هو عايش ميت
قلقان على إيه
ما هو يشبه بعضه
ف كل الأحيان
(3)
الدمع زى البرق
علق مرارة ف حلق
الدمع لولى مفرفط
ع الحزن لسه مقربط
والكسرة مكسورة
وف توبها محصورة
معقودة ف حبالها
بتدادى أحوالها
وتدارى ف عيونها
(4)
أبواب حياتنا مربعات
مكعبات
ويا جدران السكات
ولحد ميعاد الممات
وحدات زوايا
وحطام رماد
والشرنقات بتنادى أمتى
حتغنى لينا الموسيقات
لصوت المدى
ويا قلوب الكون رضا
ودوده ومخلصة
إمتى الكئوس الناعسة
بين خمر البكا
حيكون عسلها ف الوفاق
ولا مربعنا اللى فات
بعد الحياة ما تكون
مربع من سكات
وقت الممات
نندم على إيه
ولا إيه
ع اللى جاى
ولا اللى فات
ليست هناك تعليقات:
إرسال تعليق