أوراق الود
لسه معايا
غلاف باكو الشيكولاته
وذكرى بتغزل أعمارنا
وتلضم ف الأيام
وعيون أوراق الود
المسقى بعبيره النادى
وحاولت أقراه
له قلب كبير
لكنه غرقان ف همومه
على طرف حديثه الهادى
ودموعه المكنونة ف صدره
على أد ما دوران القمراية على وشه
لكنه حزين
وبيدارى ف بسمة بقالها سنين
كان طعم الشيكولاته فى حلقى
طفولة وإحساس وخيال
كان راجع لزمان
سحبتنا اللحظة
ف براح البهجة
وبراءة شدو وفائه
أطلال اللحن ف صوته
وحواسه تتحسس ف روحه
وف لمعة ننى عيونه
يتحلى بصبر البدر ولونه
يتكلم عن نفسه
وكأنه بيغنى
من منبر على مسرح
بجميع المقامات الموسيقية
وبيعزف شوق امبارح
على ضى جوارح
بتجرح أحلامه
لساه بيعافر ف بحور النشوى
ويلملم ف الباقى من عمره
بيحاول يهرب من نفسه
فى وسط الناس
لكنه بيتوحد أحياناً
مع حزنه
برغم نجاحه وجميع الأحداث
إنما موجوع
من ذكرى ورحله
ملفوفة على غصن الإحساس
ليست هناك تعليقات:
إرسال تعليق