احتواني الانتظار
(يا دنيا بخيلة)
باقاوم بكل احتمالى فسادك
وأحاول أعافر قساوة ولادك
وباعتالى ليلك وناسينى صبحك
واشمعنى غيرى بينعم بربحك
لكنك معايا بتبقى بخيلة
وبتلاقى حجة لمعانى بديلة
لغيرى تقيدى صوابعك شموع
وأنا كل ليلة تزورنى الدموع
أنا مش شيطانك
دا أنا نبت منك وريحة غيطانك
ولسه شهادة ميلادى ف قرارك
وحتى اعترافك ماهوش راضى عنى
وبارجو تاريخك ما يسبقش سنى
ويحسب عليا وجودى حياة
وأنا بين غشاوة ما بين آه وآه
يا مركب وماشية ما باعرفش أعوم
وخايفة إنى أغرق ما بين يوم ويوم
يا ريتك رحيمة تمدى لى طوقك
دا بحرك له قيمة بيعلن صمودك
وأنا لسه باحبى ما بين العواصف
لإمتى حاقاوم بقلبى اللى آسف
على إنه طيب
وعمره ما فكر يعادى ولادك بعيد أو قريب
لإمتى حتبقى معايا فقيرة وشقيانة فيكى
لإمتى حاساوم بعمرى عليكى
وأديكى وشى بتدينى ضهرك
وما ينوبنى منك غير مرك وقهرك
أمد فى يمينى تمدى شمالك
أشد ف حبالى تهدى جبالك
أقوم شادة حيلى واسمى واعدى
ألاقيكى باعته لى جرحك فى يدى
أطبطب عليكى وأدادى ف خاطرك
بترمى ف حجرى أساكى ومخاطرك
وصابرة عليكى لكن صبرى فاض
وماباخدش موقف وأنا ع الحياد
ما باعرفش أكره ولا قادرة أعادى
ومش ضعف منى دا أنا واثقة فيكى
وحاسّه إنى حاكسب وأنا بين إديكى
وربى حينصفنى دايماً عليكى
دا أنا شاربه منك لغاية كيعانى
لإمتى يا غالية راح أفضل أعانى
واستنى بكرة تقولى لى بعده
ويا عالم إنى حاعيش بعد بعده
عموما يا دنيا وقبل ما فارقك
واسيبك لخلقك
راح استنى ردك
لإمتى بخيلة وفقيرة معايا
لإمتى .. لإمتى .. لإمتى
ليست هناك تعليقات:
إرسال تعليق